「25年前我哋搬入天水圍，果時仲係行屯門公路，未有大欖隧道。我哋住過公屋、居屋，不過後來為咗養狗，所以搬咗去住村屋。住過大棠，每年紅葉果十日真係好多人，無車返工，無車放工，好慘！不過元朗真係好有人情味，有時搭紅 Van，會聽到啲街坊講『得啦你落車啦！我幫你俾埋！』去買元寶蠟燭香，老闆會送本通勝俾熟客。我哋而家幫人做按摩治療、中藥薰蒸、通經絡，都係街坊生意，做得好，朋友會再介紹朋友過來，所以都好忙！最緊要係老實，唔好迫人買套票。端午節就到，記得唔好食咁多糯米呀！尤其是如果筋骨有傷患，食糯米會腫痛，要忍下口啦！」
~元朗係一個好特別嘅社區，呢個地方充滿人情味，住咗各式各樣嘅人，每個人都有佢哋唔同嘅故事，我哋做個紀錄同大家分享，希望你哋鍾意~