「今年我75歲啦！但係每個星期都會返學上堂，報讀咗『長者學苑』嘅課程，最近讀緊『知識進化論 Understanding Evolution』解構人類知識同思維嘅進化。我哋有時會去嶺南大學，同其他學生一齊上 lecture，做 sit-in senior student，學咗嘅知識，又可以同其他人分享。我又參加好多義工活動，例如跟耆樂警訊、愛心會等等，周圍做探訪。太太都好支持我呀！老人家退咗休，無嘢做，貢獻返個社會，自己生活又過得充實。佢哋都頒咗個『傑出長者』獎俾我，希望可以鼓勵到其他長者，一齊活得精彩啦！」
~元朗係一個好特別嘅社區，呢個地方充滿人情味，住咗各式各樣嘅人，每個人都有佢哋唔同嘅故事，我哋做個紀錄同大家分享，希望你哋鍾意~